Forum graubünden Cultura 2023

Suenter la preschentaziun dal project tras il president da l'uniun Stefan Forster ha Sarah Amsler (Uffizi da cultura) mussà tge puncts da contact ch'i dat tranter las activitads da l'Uffizi da cultura e graubünden Cultura. Il referat d'input cun Mirjam Hadorn (mainafatschenta Klangwelt Toggenburg) e Christian Gressbach (mainafatschenta Toggenburg Tourismus)ha pussibilità in'egliada instructiva en la pratica. La lunga collavuraziun tranter l'organisaziun turistica e l'organisaziun Klangwelt, adina da tempra artistica, ha mussà a moda exemplarica ils potenzials e las cuntradicziuns dal turissem cultural per in svilup regiunal persistent. Cun tals exempels vul graubünden Cultura pussibilitar debattas criticas che collian acturas ed acturs dal turissem cultural in cun l'auter e promover il barat d'experientschas dal cuntegn e dal fatg.

Durant la discussiun da podium ch'è suandada cun osps dal Toggenburg, Michael Caflisch (Uffizi per economia e turissem) e Marianne Fischbacher (presidenta cumissiun da turissem Glion) èn las sfidas e schanzas en il turissem cultural vegnidas discutadas vinavant. Las participantas ed ils participants han era pudì tschentar lur dumondas davart il project. Tras quai èn sa mussadas malsegirezzas davart la structura dal project ed en spezial davart ils mecanissems finanzials. Era vuschs criticas èn s’exprimidas e nus avain gugent prendì encunter lur impuls e remartgas.

Nus engraziain per la numerusa participaziun e per il grond interess!

Grazia | Danke | Grazie

graubünden Cultura sa chapescha sco post da svilup e servetsch chantunal cumplessiv per organisaziuns ed acturs dal turissem cultural dal Grischun. graubünden Cultura n'è betg in program da promoziun per singulas iniziativas da projects. Tuttina ha graubünden Cultura l'intenziun da stgaffir plivalurs per las singulas creacultura, exponents turistics u organisaziuns tras il posiziunament da la cultura en il turissem. 

I va per

• furmar in'organisaziun da tetg chantunala
• realisar occurrenzas da sensibilisaziun e da dialog
• metter a disposiziun instruments da qualitad e formats da furmaziun
• promover svilups da purschidas e cooperaziuns entaifer las spartas culturalas
• pussibilitar chaschuns da communicaziun communablas e debattas dal fatg curatadas
   

Preschentaziun per telechargiar