Giudair la cultura ed il sport da naiv

En l'intervista cun radio Südostschweiz descriva Kaspar Howald l'impurtanza dal turissem cultural sco element futur da la strategia turistica en il Grischun. Entant ch'il chantun ha attratg l’attenziun fin ussa cunzunt cun il sport da naiv, cun turas da viandar e purschidas da recreaziun, duai la cultura star ussa pli ferm en il focus per pudair concepir la purschida a moda pli vasta ed independenta da las fluctuaziuns stagiunalas. Il turissem cultural duai gidar da prolungar la durada dals segiurns, crear attaschadadad e pledentar novas gruppas en mira.

A la dumonda dal moderatur, sch'il Grischun disponia dad avunda cultura autentica, abstrahada da clischés sco «Heidi» u «Uorsin», accentuescha Howald la ritga ierta culturala da la regiun: cun 150 valladas, cun trais linguas, duas confessiuns ed ina lunga istorgia sco regiun da transit porschia il Grischun ina basa culturala unica. Plinavant existia qua ina viva scena culturala contemporana, ma ch’ella saja memia pauc visibla fin ussa.

Howald declera ch'il turissem cultural na saja betg ina concurrenza per il sport d'enviern, mabain ina cumplettaziun raschunaivla che vegnia era percepida da destinaziuns classicas sco San Murezzan, Arosa e Tavau sco part preziusa da lur attractivitad. Ultra da projects-mussavia sco il Festival da jazz u Origen gioghian era purschidas multifaras pli pitschnas ina rolla impurtanta. Quai possian esser per exempel museums locals, visitas guidadas u autras iniziativas localas che accentueschian l'identitad da las destinaziuns e permettian als giasts invistas autenticas.

Era sch'i saja difficil da mesirar directamain la valurisaziun dal turissem cultural, accentuescha Howald ch’ils giasts interessads a la cultura restian savens pli ditg qua, sfundrian pli intensivamain en l'atmosfera d'in lieu e returnian pli savens.